Duha ka isolation facilities gi-turn over sa DPWH-7
CEBU, Philippines — Nahuman na sa Department of Public Works and Highways (DPWH) 7 ang duha ka isolation facility alang sa Dakbayan sa Lapu-Lapu ug Dakbayan sa Mandaue alang sa nagpadayong kombate batok sa coronavirus disease.
Niadtong Oktubre 23, 2020, na turnover ang pasilidad nga gihimo diha sa North Bus Terminal sa Barangay Subangdaku sa Dakbayan sa Mandaue ngadto kang Mayor Jonas Cortes ug mga sakop sa konseho.
Ang maong pasilidad masudlan og 60 ka mga pasiyente. Si Cortes namahayag nga bisan padayon na ang pagkunhod sa mga na-report nga natakboyan di kinahanglang mokumpiyansa ang katawhan.
“Para nako, it’s better to be prepared. It’s better to have it and not need it than to need it and don’t have it,” nagkanayon si Cortes.
Gipahigayon sab ang turnover sa isolation facility sa kagamhanan sa Dakbayan sa Lapu-Lapu nga giugmad gihapon sa DPWH- 7 atbang sa Hoopsdome sa Barangay Gun-ob .
Mahimo kining mabutangan og 32 ka mga pasyente.— Romeo T. Limpangog/IBM
Cebu City nakatala og siyam ka bag-ong kaso
Miabot na sa 10,205 ang total cases sa novel coronavirus disease (COVID)-2019 sa Cebu City human nakatala og siyam ka bag-ong mga kaso base sa kinauwahiang datos sa Department of Health Central Visayas.
Sa datos sa maong ahensiya makita nga ang aktibong kaso sa Cebu City naa nalang sa 213. Nakatala sab ang siyudad og walo ka dugang nga nangaayo, ang siyudad karon dunay 9,314 total recoveries ug nagpabilin sa 678 ang nangamatay.
Ang Mandaue City nakatala sab og pito ka bag-ong kaso sa COVID-19, duna sila karo’y 2,544 total cases sa COVID-19, 82 niini ang active cases.
Naa na sa 2,302 ang recoveries sa siyudad, nadugangan kini og usa, samtang 160 sab ang ilang namatay.
Samtang ang Lapu-Lapu City nakatala og duha ka bag-ong kaso sa COVID-19. Ang Lapu-Lapu City dunay 2,449 total cases sa COVID-19, 123 niini ang active cases.
Nakatala sab ang dakbayan og 18 ka dugang nangaayo hinungdan nga naa na sa 2,223 ang recoveries sa siyudad og 103 ang nakalas.
Sa datos sa DOH-7 ang Central Visayas dunay 22,023 kinatibuk-ang kaso sa COVID-19; samtang 940 ang aktibong kaso, ug 19,754 na ang nangaayo. Samtang 1,329 ang nangamatay. /IBM (BANATNEWS)
- Latest
