Nanuborno’g P500 sa polis napriso
CEBU, Philippines — Sa prisohan ang punta sa usa ka dalaw human kini namugos nga makaduaw sa higala niining dinakpan pinaagi sa pagsuhol unta sa polis nga nagbantay diha sa Talisay City detention cell.
Gipaslak hinuon sa karsel Ricky Zapanta Lisondra, 41, usa ka messenger sa usa ka insurance company nga taga Barangay Biasong sa nahisgutang siyudad kay matud pang Police Major Gerard Ace Pelare, pangu sa Talisay City Police Station nisuway kini og suborno sa jailer.
Nihangyo kining pasudlon ang ilang silingan nga ang paryente nadakpan tungod sa ilegal nga drugas. Apan gidili man kini karong panahon sa pandemiya maong wala siya tugoti. Imbes nga mopauli , giingong mitunol hinuon kini og P500 sa nagbantay aron mosugot. Dihadiha gidakop kini sa maong polis ug gipaslak sa prisohan kauban ang ila untang bisitahon. /IBM (BANATNEWS)
- Latest
