Laing bodegero sa drug group nadakpan

CEBU, Philippines — Giingong bodegero og shabu sa usa ka drug group nasikop sa buybust operation sa Station Drug Enforcement Unit sa Labangon Police Station sa Dakbayan sa Sugbo ug nasakmit ang P5.4 milyones nga gidudahang shabu.

Ang operasyon gipangulohan ni Police Captain Jonathan Dela Cerna Huwebes sa kaadlawon diha Sitio Tuburan, Brgy. Punta Princesa, Dakbayan sa Sugbo.

Ang dinakpan mao si Rhoy Stephen Himang, 23, resudente sa maong dapit nga nakuhaan og 800 gramos nga gidudahang shabu.

Ang operasyon misunod sa malampuson sab nga operasyon sa mga sakop sa kapolisan sa Lapu-Lapu City Police Office ug PRO-7 batok sa kanhi magtutudlo sa unibersidad nga karon giingong sab bodegero na sa sindikato sa drugas.

Nasikop sa mga awtoridad si Gilbert Fuensalida Lumanog, 30 , diha sa Brgy. Subabasbas sa Dakbayan sa Lapu-Lapu  niadtong Oktubre 21, 2020.

Giingon nga gikan sa nasud Myanmar ang P150 milyones nga drugas nga nakumpisa gikan kaniya matud pa sa hepe sa Police Regional Office (PRO)-7 nga si Police Brigadier General Albert Ignatius Ferro.  Si Ferro  miingon nga ang operasyon may koordinasyon sa Drug Enforcement Unit sa National Capital Region Police Office (NCRPO) kay sila maoy unang nagmonitor dul-an usa ka bulan kang Lumanog.

Gisubay nila karon kinsay mga koneksyon sa suspek dinhi sa Central Visayas sanglit si Lumanog 'bodegero' ra sa drug group.

Nasayran sab nga ang nakumpiskang ilegal nga drugas gikan sa 'Golden Triangle'  base sa pagputos niini. Ang grupo nagbase didto sa nasud sa Myanmar.

Nasuta sa imbestigasyon nga sa Cebu City, Mandaue, Lapulapu ug pila ka lugar sa lalawigan ang sakop sa operasyon ni Lumanog.

Si Ferro miingon nga daghan gyud kaayong malutsan aron makasulod ang illegal nga drugas dinhi sa Sugbo.

"We believe that the island is very porous, remember that PDEA-7,two months ago, were able to seize (illegal drugs) from the pier... these are all smuggled illegal drugs,"pasabot pa ni Ferro. /IBM (BANATNEWS)