CEBU, Philippines — Dili mominos sa 119 ka mga sakyanan nga nakalapas sa night illegal parking o City Ordinance 2004 ang na clamp sa mga tinugyanan sa Cebu City Transportation Office CCTO.
Kini ang gitug-an sa pangulo sa Cebu City Disaster Risk Reduction and Management Office (CCDRRMO) Ramil Ayuman.
Matud pa ni Ayuman, subay sa direktiba sa Department of Interior and Local Government, kinahanglan ang mga barangay mao ang modumala sa kahapsay sa kadalanan ilabi na sa pagbadlong sa mga magpataka ug parking.
Gidugang ni Ayuman, niadtong buwan sa enero sa wala pa ang pandemic, gihingusgan ang clearing operations uban sa mga opisyal sa barangay, apan karon susama ug wala na magpakabana ang mga opisyal.
Ang operasyon sa CCTO naglangkub sa mga lugar sa B. Aranas, Rivaridge Tisa ug Tres de Abril. /MEL (BANATNEWS)