Dunay komosyon sa wala pa ang pagpamusil ug paghikog sa polis

CEBU, Philippines — Ang hepe sa Talisay City Police Station (TCPS) Police Major Gerard Ace Pelare nihulagway nga crime of passion ang nalambigitan sa iyang deputy chief.

Matud ni Pelare nga adunay duha ka testigto ang nitug-an nga ilang nakita ang pagsulod ni Vernice Cardeno, 31-anyos diha sa quarter ni kanhi Police Lieutenant Praxilo Albiso niadtong Martes sa buntag. Ug pipila ka oras ang nilabay nakadungog na sila og upat ka buto sa armas.

Ang duha daling gidala ngadto sa tambalanan apan pareho kining nakabsan sa kinabuhi.

Si Pelare nagkanayon nga base sa nakuhang ebedensiya ug sa sitwasyon sa mga butang diha sa sulod sa quarter posible nga adunay nahitabong komosyon nga wala madungog sa mga tawo diha sa gawas. Nasayran nga giingong ang duha adunay relasyon ug nabulgar na kini.

Gani, ang bana ni Cardeno nga usa ka seaman nidangop kini sa national TV ug gisaysay ang iyang reklamo batok sa iyang asawa.

Gibutyag ni Pelare nga nakadawat siya og report nga si Albiso gipasakaan kini og kasong rape ni Cardeno. Gipadayag ni Pelare nga ang personal nga problema ni Albiso wala kini makaapekto sa iyang trabaho. Gituohang wala na makaagwanta si Albiso sa personal nga problema niining giatubang hinungdan nga naghikog kini. Ang haya sa duha naa sa ilang tagsa-tagsa ka pamilya. (BANAT NEWS)