CEBU, Philippines — Kapin sa 500 ka establisamento ang giingong nakahatag og obstruction sa pipila ka mga sapa sa Dakbayan sa Sugbo.
Matud ni Ramil Ayuman, pangulo sa Cebu City Disaster Risk Reduction Management Office Ramil nga base kini sa pasiunang report sa River Management Council ug ang labing daghan niini nahimutang diha sa Barangay Mambaling diin adunay 308 ka estraktura ang nilapas sa 3-meter easement zone.
Sa niaging adlaw gisugdan usab Cebu City Office of the Building Official (OBO) ang pag-inspeksiyon sa mga establisamento ug kabalayan nga nahimutang kilid sa mga sapa. Gihan-ay na sa maong ahensiya ang listahan sa mga administrador sa mga establisamento nga nakalapas sa 3-meter easement zone.
Una na nga gibutyag ni Mayor Edgar Labella nga ipatawag niya ang mga buiding administrator aron magtinabangay sa paghulma og pamaagi nga makasulbad sa problema sa baha.
Sa laing bahin, gitinguha sa kagamhanan sa Dakbayan sa Mandaue ang pagpadayon sa paghawan sa mga informal settlers nga nakalapas sa 3-meter easement zone diha daplin sa Butuanon River o Mahiga Creek.
Gitinguha usab nga mapadayon na ang flood control project nga sulbad sa baha.
Ang siyudad nagplano sa paghangyo sa Department of Interior and Local Government sa pagkonsiderar sa giluwatan nga Memorandum Circular No. 2020-068 niadtong Abril 2, 2020 nga nagmando sa mga lokal nga kagamhanan sa pag-angan-angan una sa mga demolisyon ug eviction panahon sa enhanced community quarantine.
Si Atty. John Eddu Ibañez, executive secretary ni Mayor Jonas Cortes nagkanayon nga sa dili pa himuon ang clearing operation sutaon una ang kahimtang sa settlers nga maapektohan. (BANAT NEWS)