100 meter nga underwater cross tukoron sa Isla sa Olango

CEBU, Philippines — Gipaniguro ni Mayor Junard Ahong Chan nga dili makamugna og kadaot sa mga gasang ang tukoron nga 100 meter underwater cross sa Isla sa Olango, Dakbayan sa Lapu-Lapu. Matud ni Chan nga kini maoy labing dako nga underwater cross nga tukoron ug dako ang kahigayonan nga malakip sa indigay sa Guinness World Record.                                  

Nasayran nga ang kasamtangan karong title holder niini anaa lang sa 70 metros ang gitas-on.

Gibutyag ni Chan nga ang underwater cross anha mugnaon sa Barangay Tingo, Isla sa Olango ug molagbas kini paingon sa Barangay Punta Engaño sa mainland sa maong dakbayan.

“Ang atong butangan patag ug wala gyuy corals sa maong area. Purely sand ra gyud”, ni Chan pa.

Gilauman ni Chan nga ang underwater cross mahuman kini sa sunod tuig nunot usab sa ika-500 ka tuig nga pagsaulog  sa Kristiyanismo ug kadaugan sa Mactan. Gilauman usab nga ang maong underwater cross makaagni sa pagtagad sa mga lokal ug langyaw nga turista tungod kay makita man kini gikan sa eroplano nga ilang sakyan paingon sa paglupad ug pagdugpa diha sa Mactan Cebu International Airport (MCIA), Dakbayan sa Lapu-Lapu. /BDB (BANATNEWS)