Polis mipatay sa babaye, naghikog sab
CEBU, Philippines — Luyo-luyong hepe sa Talisay City Police Station ang giingong mipusil patay sa gialegar nga iyang hinigugma ug nagpusil sab sa iyang kaugalingon diha sulod sa iyang opisina sa Police Community Precinct sa Barangay Bulacao, Dakbayan sa Talisay kagahapon sa buntag.
Ang polis mao ang deputy chief sa TCPS Talisay City Police Station nga si Police Lt. Praxilo Albiso,40, samtang ang babaye mao si Vernice Cardeno, 31.
Si Police Major Gerard Ace Pelare, pangu sa Talisay City Police Station miingon nga ang duha anaa sa iyang lawak sa polis adtong higayona.
Kalit lang nga nadungog ang upat ka sipang buto hinungdan nga dali nilang gisusi ang buhatan ni Albiso ug nakita silang duha nga nagkadugo.
Gidala sila sa tambalanan apan wala makasugakod ug nakabsan pareho sa ilang kinabuhi. Gituohan sa mga imbestigador nga gipusil tulo ka higayon ni Albiso si Cardeno ayha pa nagpusil kausa sa iyang ulo. Usa ka .9mm nga pistola ang nakuha diha sa lawak.
Wala mokumpirmar o mohimakak si Pelare kun may relasyon ang duha apan matud niya maayo motrabaho si Albiso apan aduna gyud kinj problema sa iyang personal nga kinabuhi.
“We are still conducting further investigation kung what is the relationship between the two of them apparently ang nahitabo ani is gipusil ang babaye,naay gunshot wound sa iyang ulo, then after that gahikog sa Lt. Albiso,” matud ni Pelare.
Ang relasyon sa duha nabaniog sa nasudnong telebisyon pinaagi sa programa ni Raffy Tulfo niadtong bulan Pebrero human nga ang bana ni Cardino nga usa ka seaman midangop sa maong programa ug mipasangil sa asawa niini nga dunay karelasyong opisyal nga polis nga gituohang si Albiso.
Sa maong programa ang bana sa babayeng namatay mipadayag nga nagduda siya nga dili iyahang anak ang gisabak sa kapikas. —Iris Hazel M. Mascardo, The Freeman/IBM
- Latest
