DOLE niluwat og advisory alang sa 13th month pay

CEBU, Philippines — Ang Department of Labor and Employment (DOLE) niduso na kini og advisory kalabot sa guidelines alang sa paghatag sa mga kompaniya og 13th month pay ngadto sa ilang mga empleyado.

Base sa facebook page sa DOLE-7 gi-upload niini ang nadawat nila nga Labor Advisory No. 28 gikan sa ilang ulohan nga buhatan diin aduna kini pirma ni Labor Secretary Silvestre Bello III.

Nalatid sa maong advisory ang paghatag og 13th month pay ngadto sa mga empleyado.

Base sa maong advisory nga dili mahimo nga ilapas sa Disyembre 24 ang pag – apod-apod sa 13th month pay.

Ang nahisgutang ahensiya nagkanayon nga dili sila mosugot  og exemption o kausaban sa sestema niini.

Sa dili pa molapas ang Enero 15 sa sunod tuig, gimandoan usab nila ang mga kompaniya nga mohimo og report ug iduso kini sa ilang rehiyonal nga buhatan kalabot sa ilang pag-release sa mga 13th month pay.

Ang 13th month pay bali kini og one-twelfth (1/12) sa basic salary sa empleyado sa calendar year. /BDB (BANATNEWS)