Libud-suroy taga siyudad ra

CEBU, Philippines — Mga libud-suroy sa kadalanan nga gihipos sa kagamhanan sa siyudad sa Sugbo sa miaging semana, ang kadaghanan dili mga dayo ug walay balay nga kapuy-an human sa gihimong imbestigasyon sa ilang mga backgrounds.

Sa 154 ka mga gihipos nga libud-suroy nasuta nga ang 149 kanila dunay mga balay apan mas gipili nilang magpuyo sa karsada aron mamalimos.

Si Police Lt. Col. Wilbert Parilla, deputy city director for operations sa Cebu City Police Office (CCPO) miingon nga lima ra ka buok sa gihipos ang naa karon gipahiluna sa halfway house sa siyudad.

Ang 149 nahibaw-an nga duna gyuy mga balay dinhi sa siyudad mao nga gihatud sila balik sa ilaha human nga sila gipaubos sa profiling.

Matud ni Parilla kadaghanan sa mga nahipos gikan sa mga dalan duol sa mga simbahan sa downtown area nga diin nahibaw-an sab nga adunay sinimanang manghatag og mga relief goods.

“Katong uban naa na silay mga balay diri sa Cebu, anha lang na sila mamuyo diha sa may Santo Rosario, or sa nga simbahan kay duna diay nga schedule nga mga panghatag dinha nga mga goods, that’s diha sila kang mupuyo aron makauna sila sa linya,” matud Parilla.

Gani nahibaw-an sab nga ang uban kanila mga street vendors nga wala ganahing mamauli sa ilaha ug anha ra nangatulog sa aseras diin sila naninda kay nahadlok nga mailogan og pwesto sa uban.

Giawhag karon ni Parilla ang mga indibidwal o mga organisasyon nga nanghatag aning mga relief goods sa mga anaa sa aseras nga mas maayong adto nalang nila kini direkta ihatag sa  social welfare office sa siyudad aron sila nay mohatag niini ngadto sa mga tinud-anay nga nagkinahanglan.

Kadtong mga taga siyudad ra, gipapaulo balik ngadto sa ilang mga barangay samtang kadtong gibutang sa halfway house giproseso na ilang dokumento aron sila makapauli sa ilang mga probinsya ubos sa Balik-Probinsya Program.

Gibutyag sab ni Parilla nga kining lima mga Locally stranded Individuals (LSI) nga napugos nalang pagpuyo sa aseras tungod nahutdan na og kwarta o mga pamaagi aron makabalik sa ilang mga probinsya.  “As of now,ato na silang gi medical and then gi process na sad nato ang ilahang pag-uli sa ilang mga probinsya, dili lang kay Cebu Province, naa sa’y taga Mindanao,” dugang pa ni Parilla.

Matud pa nga sa pagkakaron, 30 porsiyento palang sa mga libud-suroy sa siyudad ang nahipos sa kagamhanan mao nga magpadayon ang operasyon pagpangita kanila ug pagtangtang kanila gikan sa karsada.

Tanang nahipos gipanglista ug gikuhaan og mga impormasyon aron nga kun sa sunod nga higayon madakpan sila pag-usab dili na sila pasayloon ug pasakaan na og kaso subay sa Anti-Mendicancy Ordinance sa siyudad.

Ang mga libudsuroy gipaubos tanan sa swab testing aron pagsiguro nga coronavirus disease (COVID-19) free sila.

“Tungod man gud sad kay dili nato pwede dunganon tanan kay mamahimo na sad siya nga violation kay daghan na sad kaayo so kung maabot na ta ug 150 maximum 200,ato na sad i-stop kay ato na sad i process, kay i- medical pa man gud silang tanan,” dugang pasabot sa opisyal.

Ang rescue operations gihimo sa hiniusang pwerswa sa  kapolisan ug mga sakop sa Department of Social Welfare and Development, City Health Department and Prevention, Restoration, Order, Beautification and Enhancement (PROBE) team. —The Freeman/IBM