Advisory council umolon alang sa pag-responde og sunog

CEBU, Philippines — Cebu City Disaster Risk Reduction and Management Office mohimo ug advisory council nga langkoban sa mga tinugyanan sa Bureau of Fire Protection, ERUF, Red Cross ug Association of Barangay Fire Brigade aron makahimo ug protocol sa pag responde sa alarma sa sunog.

Kini ang gitug-an sa pangulo sa CCDRRMO Ramil Ayuman, pinaagi sa iyang social media post.

Suma pa ni Ayuman nga ang pagmugna sa advisory council aron maoy mogiya sa pag responde sa alarma sa sunog.

Kini human sa nahitabong sunog sa usa ka hotel sa may Mango Avenue,  diin adunay daghang mga barangay fire brigade ang nakasulod bisan ug walay breathing apparatus base sa report nga iyang nakuha sa BFP.

Base sa imbestigasyon gituhuang hinungdan sa pag-ulbo sa kayo mao ang lithium lead-acid battery cells nga giingong makadaut sa lawas sa tawo.  Sumala pa ni Ayuman, iyang nasayran nga ang mga responders nga nitubag sa alarma, na-exposed sa heavy metal poisoning, diin adunay sintomas nga naglangkob sa pagkalipong, pagsuka, pagsakit sa ulo ug sakit sa pag ginhawa, kalibanga ug brown ang ihi.

Si Ayuman, niawhag sa mga responders nga kung aduna silay nasinati sa maong sintomas nga mopahibalo gilayon aron mahatagan og aksyon. Rowena D. Capistrano/MEL

Videoke gidili na sa Lungsod sa Santander

Gidili na sa Lungsod sa Santander sa Probinsya sa Sugbo ang operasyon sa video karaoke matag weekdays.

Usa ka Executive Order ang giluwatan ni Mayor Marites Buscato alang niini nga naglatid,  "An order prohibiting the operation of video karaoke machines/units and other audio equipments that create noise, within the Municipality ot Santander from 8:00AM to 5:00PM on all weekdays within the period of modified general community quarantine"

Ubos sa maong kamanduan ang Mayor nagkanayon nga ang mga tinun-an nag sugod na sa online ug modular distance learning sessions sa mga panimalay niini samtang ang ubang empleyado anaa ubos sa work-from-home. Aron paghatag og konsiderasyon sa mga estudyante ug empleyado, gipatuman sa lungsod ang pagban sa mga mag videoke ug uban pang audio equipment sa adlaw atol sa weekdays samtang anaa pa sa MGCQ

" the same ordinance prohibits video karaoke machines/units (1) in open spaces, (2) displaying exhibiting or portraying any lewd, pornographic, sexually suggestive or obscene images, among other" dugang pa sa maong ordinansa.

Atol sa Sabado ug Dominggo ug inig alas 5:01 sa hapon hangtod alas 10 sa gabii, kun mag videoke man kinahanglan hinay ra ang volume o di molapas sa 90 dB (A). /MEL (BANATNEWS)