DOH misugyot og estriktong monitoring sa mga minors ug seniors

CEBU, Philippines — Tigpamaba sa Department of Health Central Visayas Dr. Mary Jean Loreche, niawhag sa higpit nga pagpatuman sa health protocols ug lakip usab ang pagpahigayon og monitoring ug surveillance sa mga nag-edad ug 15 anyos ngadto sa 65 anyos.

Kini human nihatag ug kamanduan ang Inter Agency Task Force for the Management of Emerging Infectious Diseases nga mitugot na nga ang nagpangidaron ug 15anyos ngadto sa 65 anyos mahimo nang makagawas sa ilang panimalay subay sa resolution 79 nga giluwatan niadtong Biyernes.

Matud pa ni Loreche, adunay duha ka butang nga angay lantawon sa maong resolusyon, una ang ekonomiya diin ang 15anyos pataas nasakop na sa young workforce ug mahimo na sila mokita.

Ang ikaduha mao ang panglawas kung diin ang 15 anyos pataas himsog og lig-on ang ilang immune system, samtang ang 60-65 anyos highly able ug capable pa nga mahimong productive.

Suma pa ni Loreche nga ang hagit alang sa maong age group mao ang pagsiguro sa ilang kaugalingon nga healthy ug protektahan ang ilang kaugalingon sa virus ug lakip usab ang ilang pamilya. /MEL (BANATNEWS)