Dul-an 3 mil naapektahan sa baha sa Mandaue
CEBU, Philippines — Dul-an 3 mil ka mga molupyo sa Dakbayan sa Mandaue ang naapektahan sa pagbaha ug pagdahili sa yuta mugna sa kusog nga pagbunok sa ulan sa miaging Martes sa gabii sumala pa sa lokal nga City Disaster Risk Reduction and Management Office (CDRRMO).
Si Felix Suico Jr., pangulo sa CDRRMO sa maong dakbayan miingon nga ang mga barangay nga naapektahan mao ang Umapad, Maguikay, Tabok, Paknaan, Alang-Alang ug Casuntingan.
Napulo ka panimalay ang naapektahan sa pagdahili sa yuta sa Sitio San Jose sa Barangay Maaguikay maong gipabakwit sab nila ang 60 ka mga tawo.Miawas usab ang tubig sa Butuanon River sa tulo ka mga sitio sa Barangay Paknaan ug gibanlas ang mga payag nga gipuy-an sa pipila ka residente.
Sa pikas bahin, nibuhagay ang yuta ug mga bato diha sa karsada sa Sitio Telepono, Barangay Manipis, Dakbayan sa Talisay niadtong Miyerkules sa gabii human nahugno ang retaining wall nga tipik sa road widening project sa lugar. Si Kapitan Joselito Laurente nagtuo nga sub-standard ang pagkahimo sa paril kay gibutangan lang og mga bato ug gamay nga semento.
Si Willy Abatayo, supervisor sa QM builders nihimakak nga sub-standard ang ilang trabaho kay wala pa mahuman ang maong trabaho. Gabriel Bonjoc/IBM (BANATNEWS)
- Latest