Landslide, baha nasinati niadtong Huwebes sa gabii

CEBU, Philippines — Pipila ka mga dapit dinhi sa Sugbo ang naapektahan sa sagunson nga pagbunok sa uwan niadtong Huwebes sa gabii tungod sa nahitabong landslide ug pagkatumpag sa mga kongkretong paril.

Sa pagbunok sa uwan  midahili ang yuta sa Sitio Lupa, Barangay Sapangdaku, Siyudad sa Sugbo sumala pa sa Officer-in-Charge sa Cebu City Disaster Risk Reduction Management Office(CCDRRMO) Ramil Ayuman.

Adunay mga kabalayan nga naapektuhan sa maong panghitabo. Ang CCDRRMO nakig-alayon dayon sa City Engineering Department aron makuha ang bato ug uban pa nga nagbabag sa dalan.

Nakig-alayon na sila sa Mines and Geosciences Bureau(MGB)-7 aron mangayo og updated geo-hazard map sa landslide ug flashfloods prone area sa Cebu City.

“We need updated na gyud data of course and causes ani continuous nga rain but we need updated geo hazard aning mga landslide prone areas aning flooding in coordination with Mines and Geosciences Bureau,” sigon ni Ayuman.

Gihulagway ni Ayuman andam ang siyudad aning mga landslide ug pagbaha apan lisod kun asa ipang-relocate kadtong mga naaepektuhan tungod sa kadaghan nila.

Baha sa Talisay

Sa Dakbayan sa Talisay, duha ka mga paril sab ang natumpag ug may naluka nga parte sa karsada  nga nakapahinay sa dagan sa trapiko diha Barangay Linao nianang gabhiuna.

Si Konsehal Ofelia Ylanan nibutyag nga sud sa 37 ka tuig niya nga pagpuyo sa dapit karon pa nahitabo ang grabe nga kadaot sa baha. Natumpag ang paril sa ilang silingan.  Sama sa gihapon, barado sa mga basura ang ilang mga kanal maong niawas ang tubig.

Si Markyn Reyes, sakop sa City of Talisay-Traffic Operation Development Authority (CT-TODA) miingon nga daghan mga sakyanan silang gi-rescue human nitiurok sa tunga-tunga sa karsada.

Hinuon pila ka oras nila nga pagmonitor sa lugar nihubas rasab kini ug nabalik sa normal ang dagan sa trapiko.  — Gabriel Bonjoc/IBM (BANATNEWS)