Mga obispo misuporta sa pagsira sa sam-ang
CEBU, Philippines — Giawhag sa mga obispo sa sugbo ang mga magtutuo nga dili na lang itumong sa adlaw sa kalag-kalag ang pagbisita sa ilang mga mahal sa kinabuhi diha sa mga sam-ang.
Matud pa ni Archbishop Jose Palma sa Archdiocese of Cebu, nisabot siya sa kagustohan sa lokal nga kagamhanan nga pagsira sa mga sam-ang sa adlaw sa kalag-kalag aron kalikayan ang pagkatap sa coronavirus disease.
Dugang pa sa Arsobispo, kultura man gayud sa mga sugbuanon nga mopakita sa gugma bisan sa mga nitaliwan na nila nga mahal sa kinabuhi, apan maoy iyang hangyo nga motuman lang sa pahimangno sa mga otoridad.
Subay niini si Palma nitug-an adunay mga misa nga himoon ang kaparian uban sa acolytes diha sa sementeryo atol sa kalag-kalag apan walay mga tawo nga makasulod.
Si Auxiliary Bishop Midyphil Billones, ang Team Moderator sa Team of Pastor sa National Shrine of St. Joseph sa Dakbayan sa Mandaue, nitug-an nga suportado nila ang tinguha sa mga local government nga isirado ang mga sam-ang tungod kay alang ra usab kini sa kaayuhan sa tanan.
Samtang sa laing bahin suportado usab ni Palma ang bag-ong gitudlo nga Apostolic Nuncio to the Philippines nga si Archbishop Charles John Brown, kinsa maoy mipuli kang Archbishop Gabriel Caccia.
Si Caccia mibiya sa posisyon niadtong nobyembre 2019, aron mahimong permanent observer sa Holy Father alang sa United Nations sa New York. /MEL (BANATNEWS)
- Latest
