Panglawas sentro sa pagpangandam sa pabukas sa klase matud sa DepEd
CEBU, Philippines — Sentro sa pagpangandam nga gihimo alang sa pagsugod sa distance learning karong Oktubre 5 ang kaluwasan sa panglawas sa mga tinun-an ug mga magtutudlo nunot niining hulga sa pandemiya sa Covid-19.
Matud pang Department of Education(DepEd)-7 Regional Director Dr. Salustiano Jimenez gipangandaman nila kung dunay mga kakulian silang masugatan aning bag-ong sistema sa edukasyon.
Sigon ni Jimenez sa pagsugod og abli sa klase, magbasa ug tubagon sa mga tinun-an ang ipanhtaga nga mga modules sugod karong Lunes.
Hangtud ning pagbalita, subsob na ang pagpanghatud sa mga magtutudlo ug mga home tutors sa mga modules ug flash drives niadtong mogamit og offline nga pamaagi.
Target sa DepEd nga karong adlaw nga Biyernes Oktubre 2 humanon ang pagpanghatag sa mga modules.
“Lahi-lahi man ang pamaagi naay once a week ang pag-deliver ug pag-retrieve naa puy ubang mga schools nga every two weeks so karong Friday gi-deliver the next two Fridays mao pa puy pag-retrieve and another deliver labi na kanang mga lagyo intawon ba maglisod man ta og magsige og larga atong maestra, atong tutors or even ang atong mga parents nga magkuha sa mao na ang gipamaagi,” ni Jimenez pa.
Giklaro sab ni Jimenez nga wala’y mga tinun-an nga paadtuon sa mga tunghaan gumikan kay dunay palisiya nga 21-anyos paubos dili makagawas sa balay.
“That’s part of our Do’s and Don’ts sa atuang mga schools nga ipamutang nga para sa health and safety nga katong mga bata dili gyud allowed moanha sa eskwelehan, so wala gyuy bata moanha sa eskwelahan because ang atuang gi-cater ang basic education from kinder to grade 12 wala pamay 21,” ni Jimenez pa.
Sumala pang Jimenez, mao sab kini ang sundon sa mga private schools.
“Actually the permit that we give to the private schools kanang mga special permit para sa school year kay they are applying for special permit for the school year all private schools so in my approval nakabutang gyud didto unsa nga modality ilang gamiton,” dugang sa director. /IBM (BANATNEWS)
- Latest
