Mabatid gipasakaan na sab og kaso sa kanhi sakop
CEBU, Philippines — Laing reklamo na sab ang gipasaka batok kang Cebu City Councilor Niña Mabatid gikan sa kanhi empleyado sa iyang buhatan nga ginganlan og Roldan De Los Reyes. Gipasaka ni De Los Reyes sa piskalya kagahapon ang reklamong libel ug oral defamation batok sa kanhi niya amo.
Sa iyang affidavit , gipakaulawan matud pa siya ni Mabatid sa mga media interviews human siya gitawag niini og palahubog ug tapulan sa trabaho nga maoy rason nga matud pa gitangtang siya sa trabaho.
Dugang statement ni De Los Reyes , nga nasakitan siya sa maong mga pulong nga niresulta nga dunay mga gabii nga naglisod siya og katulog.
Kahinumdoman nga nakadawat siya sa maong mga pulong isip reaksyon ni Mabatid human gireklamo usab niya kini sa Ombudsman sa miaging semana gumikan kay matud gipabaligya siya og manok nga walay koneksyon sa iyang trabaho sa City Hall. Una na nga gihimakak ni Mabatid ang maong isyu ug mitataw nga gidonar ra niya ang mga manok isip livelihood program sa kabaranggayan.
Sa habig usab ni Mabatid sa bag-ong reklamo nga iyang nadawat , ang konsehal miingon nga makita ra ang katag sa umaabot nga panahon.
“Tangtangon kaha siya if dili siya tapulan? Wa na gyud lain modawat ana niya og trabaho. Makita ra na ang katag later,” suma pa ni Mabatid.
Sa laing bahin , giatras na ni Mabatid ang gipasaka niya nga libel case batok kang kanhi konsehal Pastor Alcover, Ramil Ayuman ug Bianca Rose Serena.
Kahinumdoman nga gipasaka niya kini niadtong Nobiyembre 28 sa miaging tuig gumikan sa mga sakit nga pulong nga iyang nadawat gikan sa maong mga indibidwal.
Suma pa ni Mabatid nga nakahuna-huna siya nga moatras sa kaso gumikan kay dili siya ganahan nga magbaton og kaligutgot sa iyang isi’g-katawo ilabi na karon panahon sa pandemiya ug kauban ra usab niya sa politika sila si Alcover ug Ayuman partikular na sa grupong PDP-Laban./IBM (BANATNEWS)
- Latest