Tulo ka barangay sa Carmen aduna nay tubig

CEBU, Philippines — Tulo ka mga barangay sa lungsod sa Carmen ang nakadawat og level 2 water system.

Si 5th district Congressman Vincent “Duke” Frasco ni-turn over sa maong water system ngadto sa barangay Dawis Sur, Dawis Norte ug Cogon East.

Matag water system mokabat ngadto sa P2 milyones ang nagasto kon diin ang pagtukod niini gi-supervise sa Department of Public Works and Highways DPWH. “Dugay nang uhaw ang mga tawo sa tinud-anay nga panerbisyo. Karon, makatagamtam na ug kahupayan tungod kay aduna nay agas sa tubig nga dugay nang gihandum sa katawhan,” matod ni Frasco base sa press release nga gipagawas sa iyang kampo.

Ang Carmen maoy tinubdan sa supply sa tubig sa Metro Cebu apan sa miaging mga tuig ang mga residente sa lugar maoy nag- antos sa kakulang sa pag access sa potable water system.

Ang mga kapitan sa tulo ka barangay maoy nidawat sa maong proyekto. Gawas sa proyekto sa tubig si Frasco nakapatapos na usab sa pipila ka proyekto sa kinto distrito lakip na niini ang mga dalan. Niadtong niaging mga semana gi-inagurahan ni Frasco ang dul-an P80 milyones nga road project sa Camotes island uban ang Cebu Provincial Government. /MEL (BANATNEWS)