Contact tracing forms estriktuhon

CEBU, Philippines — Tungod sa mga contact tracing forms nga lamo-lamoan ra pagsuwat sa mga manulod sa mga department stores ug supermarkets mas estriktuhon na sa siyudad ang pag-monitor niini. Ang Emegency Operations Center nga gipangulohan ni Konsehal Joel Garganera ang Deputy Chief Implementer nakigtigom sa 33 ka mga representante sa nagkadaiyang establisamento kagahapong adlawa.

Sumala pa nga pipila sa mga sa nagpositibo nasubay sa mga contract tracers nga nakasulod sila sa mga supermarkets.

Tungod niini, nasabotan nga magbutang na og Health Infection and Prevention Control Officer sa mga ganghaan sa mga establisamento ug dili tugotan makasulod ang mga tawo kun di tarungon pagsuwat ang ilang contact tracing forms nga kinahanglang motakdo sa detalye ug impormasyon gikan sa ilang mga identification cards. Ang HIPCO mo-encode niini ug dili lang tagoan.

Kinahanglan sab nga dunay marshals ang mga supermarkets nga mopahimangno sa tanan pagsunod sa mga health protocols ug mag- decontamination human sa operasyon.

Wala nay senior citizens nga tugotang makasulod aron mangompra. Kini maoy pamaagi aron kapugngan ang pagkatap sa Covid-19 sa siyudad. /IBM (BANATNEWS)