Nasikop nga pusher nga kanhi konbiktado giimbestigar
CEBU, Philippines — Nagpadayon ang imbestigasyon sa kapolisan sa Presinto 5 sa Mandaue City Police Office (MCPO) sa ilang dinakpan nga usa ka kanhi konbiktado nga ilang nasakmitan og kapin sa P2 milyones nga kantidad sa shabu diha sa Subangdaku, Dakbayan sa Mandaue.
Ang maong kanhi binilanggo giila nga si Christian Rey Adelante 24 anyos nga taga A. Lopez, Barangay Labangon Dakbayan sa Sugbo.
Suma pa ni Police Major Aldrin Villacampa hepe sa Presinto 5 sa MCPO nga si Ardante una nang nasikop sa pagpamaligya og shabu apan nakapahimus sa plea bargaining program hinungdan nga nakagawas sa bilangguan.
Dugang pa ni Villacampa nga nakadawat sila og kasayuran gikan sa usa sa ilang mga dinakpan kabahin ni Ardante nga mibalik kini sa naandan nga illegal nga kalihokan hinungdan nga gihimo nila ang buy bust operation nga maoy hinungdan sa pagkasikop niini.
Nasakmit gikan kang Ardante ang gidala niini nga 300 grams nga gituohang shabu nga mokabat sa P2, 040,000 ang kantidad niini.
Gitataw ni Villacampa nga si Adante ilang giisip nga high value target nga pusher og shabu tungod kay makabaligya kini og P3.4 milyones pesos nga kantidad nga shabu sa matag semana diha sa Dakbayan sa Mandaue ug Dakbayan sa Lapu-Lapu. /MEL (BANATNEWS)
- Latest