Mga sementeryo Estriktong gibantayan

CEBU, Philippines — Sayo nga gisusi kagahapon sa kapolisan ug ubang ahensiya sa gobiyerno sama sa Bureau of Fire Protection, Prevention Restoration, Order, Beautification and Enhancement (PROBE) ug taga barangay ang mga sementeryo pagsuta kong natuman ba ang mga guidelines sa Executive Order No. 92-A ni Mayor Edgardo Labella.

Kagahapon ang unang adlawa nga gitugot sa kagamhanan sa Siyudad sa Sugbo ngadto sa katawhan nga makabisita diha sa mga sementeryo.

Si Konsehal Dave Tumulak, chairman sa Committee on Disaster Risk Reduction Management nagkanayon nga normal pa ang sitwasyon sa mga sam-ang kagahapon diin menos pa ang mga tawo.

Apan bisan og diyotay lang ang mga tawo nga moanha sa mga sementeryo ang kapolisan ug ubang law enforcement agencies naka-deploy na.

Samtang ang pangulo sa PROBE Raquel Arce nagkanayon nga kontradolado ang lihok sa mga tawo tungod kay menos pa ang mga niduaw diha sa mga sementeryo.

Giingong aduna silay nakitang tiguwang nga mag-rosario pa unta apan gibadlong kini sa operatives sa PROBE.

"Under the executive order ang senior citizen must stay at home so gipasabot sab nato sila ana”, matud ni Arce.

Matud usab ni Arce nga kadtong mga ilegal nga namuyo diha sa sementeryo gihangyo nga sa Lunes wala na sila diha sa lugar.

Ang mga sementeryo abli kini sugod kagahapon hangtud sa Oktubre 28 ug siradohan kini gikan sa Oktubre 29 hangtud sa Nobiyembre 4 ug ablihan na usab kini og balik sa Nobiyembre 5, 2020.

Ang Cebu City adunay 23 ka sementeryo ug mahimong makabisita ang mga tawo gikan sa alas 6:00 sa buntag hangtud sa alas 6:00 sa gabii. /BDB (BANATNEWS)