Kapin P4 milyones nga shabu nasakmit sud sa duha ka adlaw
CEBU, Philippines — Mokabat og 4 milyones pesos ang balor sa ginadiling drugas ang nasakmit sa usa ka high value individual sa gipahigayon nga buybust operation sa Station Drug Enforcement Unit sa Pardo Police Station kagahapon sa hapon.
Ang operasyon gipanguluhan ni Police Major John Karren Escober diha sa Sitio Paglaum, Brgy Bulacao, Dakbayan sa Sugbo.
Ang dinakpan mao si Marios Lugbugan Leonardo alyas “Ambo”42, nag puyo sa Barangay Lawaan 1, Syudad sa Talisay.
Matud pa ni Escober halapad ang distribution sa Illegal nga drugas ni Leonardo gikan sa Dakbayan sa Sugbo paingon sa Syudad sa Danao nga maka dispose og 1 ka kilo matag duha ka semana.
Dugang pa ni Escober nga gikan sa kaulohan og direct contact kini sa amo nga druglord ni Leonardo.
Nakuha gikan sa suspetsado ang 575 gramos sa gituhuang shabu nga mo balor og 3.9 milyones pesos. Ang dinakpan anaa karon gibalhug sa Pardo Police Station.
Samtang usa ka high value target ang nasikop usab atol sa hiniusa nga operation sa Philippine Drug Enforcement Agency kon PDEA-7, Regional Intelligence Unit ug Cebu Provincial Police Office PDEU ug CPPO-PIU sa may North Reclamation, Barangay Mabolo ning Dakbayan sa Sugbo, niadtong Miyerkoles.
Ang nasikop mao si Ronilo Bartolome, alyas Olsen, 40 anyos, driver ug residente sa Sitio San Agustine sa maong barangay, samtang ang kauban niini naka-eskapo.
Nasakmit gikan sa dinakpan ang 76 ka putos sa ginadili nga drugas nga motimbang ug 85 gramos nga mobalor ug 578mil pesos, ug buy bust money.
Matud pa ni PDEA7 Agent Kitkat Fortaleza, ang dinakpan maka dispose ug dili mominos sa 500 gramos matag semana sa metro cebu area.
Ang mga distributor niini kasagaran mohimo ug transaction sulod sa malls base sa information nga gihatag sa komunidad. Rowena D. Capistrano/MEL (BANATNEWS)
- Latest