Kaso sa dengue sa Cebu City nikunhod

CEBU, Philippines — Ang hepe sa Cebu City Health Department Dr. Jeffrey Ibones nagkanayon nga nikunhod ang kaso sa dengue sa Dakbayan sa Sugbo.

Matud ni Ibones nga base sa ilang datos sa niaging tuig sa buwan sa Enero hangtud sa Disyembre aduna sila’y natala nga dul-an sa 3,000 ka kaso sa Dengue.

Samtang karong tuiga gikan sa buwan sa Enero hangtud sa buwan sa Septiyembre aduna lang silay natala nga 1,029 ka kaso sa dengue.

Hinuon matud ni Ibones nga layo pa mahuman ang tuig ug nanghinaot siya nga dili lang unta mosaka ang kaso sa dengue ilabi na karong panahon sa pandemiya sa COVID-19.

Pipila sa mga hinungdan nga nakita sa CHD sa pagkunhod sa kaso sa dengue

Pipila sa mga hinungdan nga gitan-aw sa City Health Department tungod sa summer o ting-init ug ang mga tawo naa sa balay makagahin kini og panahon sa pagpanglimpiyo sa palibot.

Nasayran nga dunay mga programa ang kagamhanan sa siyudad aron masiguro nga ang kaso sa dengue dili mosaka.

Si Dr. Sergio Zelig Javier, medical officer sa CHD nagkanayon nga bisan pa niining pandemiya nga nasinati ang programa nila sa dengue nagpadayon.

Ang CHD aduna kini kaugalingong dengue team nga naglihok bisan niining panahon sa pandemiya sama sa pag-survey sa palibot ug pagpatuman sa 4S. /BDB (BANATNEWS)