13 ka violators nasikop sa Cordova

CEBU, Philippines — Moabot sa 13 ka mga tawo ang nasikop sa Lungsod sa Cordova nga nakalapas sa gipatuman nga minimum health protocol sa paglikay sa coronavirus disease.

Si Police Lieutenant Jan Ace Elcid Layug ang hepe sa Cordova Police Station miingon nga lakip sa ilang dinakpan ang wala magsul-ob og face mask, wala magdala og quarantine pass sa ilang paggawas ug pipila usab kanila ang nakalapas sa curfew.

Gitanggong sa kapolisan ang maong mga dinakpan ug pipila kanila ang nakapauli human usab makabayad og P200 nga multa.

Kini gihimo sa kapolisan sa pagsiguro nga hingpit gayod nga matuman sa mga molopyo ang minimum health protocol isip paagi alang sa paglikay sa pagkatap sa COVID-19. Samtang giawhag sa pangulo sa Police Regional Office 7 Police Brigadier General Albert Ignatius Ferro ang publiko nga padayong mosunod sa mga health standard protocol ilabi na kadtong mobisita sa mga sam-ang.

Matud pa ni Ferro, magsugod na unya sila pag deploy ug mga tawo sa mga dagko nga sam-ang sa central visayas.

Ang publikong mga sam-ang bukas na kini gikan sa Septembre 22, 2020 ngadto sa Octobre 28, 2020 sa dili pa kini sila tak-opan sa Octobre 29 ngadto sa Nobyembre 4, 2020 base sa kamanduan sa Inter Agency Task Force  aron malikayan ang pagkatap sa coronavirus disease.

Si Ferro nipahibawo nga aron masiguro nga hingpit nga mapatuman ang mga health protocols duna silay gipamutang nga mga help desk sa mga sam-ang diin dunay idestino nga mga polis. Rowena D. Capistrano/MEL (BANATNEWS)