Kabomberohan sa Mandaue nag-rekorida sa mga barangay

CEBU, Philippines — Nagrekorida sa kabarangayan  sa Dakbayan  sa Mandaue ang buhatan sa Bureau of Fire Protection (BFP)  dili lang sa pag-pahimangno sa mga molopyo paglikay  sa  sunog kon dili lakip na usab ang paglikay sa coronavirus disease.

Kini ubos sa programa sa kabomberohan nga gitawag og Oplan Ligtas Pamayanan (OLP) diin maoy ilang himoon ang pagbadlong sa magtapok nga mga tawo sa matag barangay.

Gihimo sa Bureau of Fire ang paglibot sa kabarangayan gamit ang ilang mga fire truck nga gibutangan og trumpa o public address system aron padayon nga mopahimango sa katawhan.

Lakip sa ilang gipahimangno mao ang pagtuman kanunay sa minimum health protocol sama sa pagsul-ob og face mask, face shield, ingon man sa social distancing, ug kanunay nga pagpanghunaw ug pag sanitize.

Si  Atty Eddu  Ibañez  ang executive secretary ni Mayor Jonas  Cortes  mipadayag usab og paghangop sa gihimong pag-rekorida sa kabomberohan sa dakbayan. 

Matud pa niya nga mitabang na ang mga bombero sa disinfection  sa pipila mga lugar  sa dakbayan pinaagi sa paggamit sa ilang mga fire truck.   Nasayran 27 ka barangay sa dakbayan maoy suroyon sa kabomberohan pinaagi sa pagbahin ngadto sa duha ka barangay nga ilang balikbalikon sa paglibot sa matag adlaw. /MEL (BANATNEWS)