Schedule sa QP ipatuman gihapon sa mga mobisita sa sementeriyo

CEBU, Philippines — Ang kagamhanan sa Dakbayan sa Sugbo istriktong mopatuman sa health protocols sa mga mobisita sa lubong sa ilang mga minahal lakip niini ang padayon nga pagpatuman sa schedule sa quarantine pass.

Kini ang gibutyag kagahapon ni Cebu City Councilor Dave Tumulak atol sa ilang tigom tali sa Philippine National Police, Prevention, Restoration, Beautification, and Enhancement (PROBE), Bureau of Fire Protection ug Cebu City Disaster Risk Reduction Management Office.

Matud ni Tumulak nga makatabang ang QP aron makontrolar ang gidaghanon sa mga tawo paglikay nga mosaka na usab ang kaso sa COVID-19.

Gihangyo usab niya ang mga mobisita diha sa sementeriyo nga dili magpataka og labay sa ilang mga basura aron dili masilotan. Walay tugotan nga makapaninda diha sa sulod ug gawas sa sementeriyo.

Sayo pa, si Mayor Edgardo Labella nipadayag kabahin sa hugot nga seguridad sa mga sementeriyo sugod karong Septiyembre 26, 2020 ug sa Oktubre 30 hangtud sa Nobiyembre 3, 2020 siradohon na ang mga sementeriyo paglikay sa pagdugok sa mga tawo. Ang kagamhanan sa siyudad nitugot kini nga ang mga kaparian ug akolitos mohimo og misa diha sa mga sementeriyo atol sa Nobiyembre 2.

Sa nahisgutang adlaw usa lang ka misa sa buntag ug laing usa sa hapon.

Adunay mga medical team, ambulansiya ug fire truck ang mag-standby diha sa sementeriyo.

Sa laing bahin, ang hepe sa Cebu City Prevention, Restoration, Order, Beautification, and Enhancement (PROBE) Raquel Arce nibutyag nga ubay-ubay ang nadawat niya nga reklamo  batok sa ubang mga tindahan nga nakabalda diha sa kadalanan ang uban niining  mga baligya.

Atol sa gihimong operasyon sa niaging adlaw nasuta sa PROBE nga maglisod og agi ang mga tawo diha sa Borromeo Street tungod kay ang display nga baligya sa tindahan diha sa lugar naabot na kini sa dalan.

Nihangop si Arce sa ilang operasyon sa niaging adlaw tungod kay nituman man ang tag-iya sa establisamento dihang ilaha kining gibadlong. /BDB (BANATNEWS)