Ligan nakigtigom alang sa seguridad sa kalag-kalag
CEBU, Philippines — Ang direktor sa Cebu City Police Office Police Colonel Josefino Ligan nakigtigom kini tali sa opisyales sa kagamhanan sa Dakbayan sa Sugbo ug Bureau of Fire Protection kabahin sa ilang pagpangandam alang sa seguridad sa pagsaulog sa adlaw sa mga Santos ug kalag.
Gibutyag ni Ligan nga magbutang sila og multi-agency center diha sa mga entrada sa mga samenteriyo sa siyudad diin ang magbantay niini mga sakop sa kapolisan, BFP, barangay volunteers ug uban pa.
Kini aron masiguro nga masunod ang kamandoan ni Cebu City Mayor Edgardo Labella nga 30 porsyento lang sa gidaghanaon sa tawo ang makasulod sa mga sementeriyo.
Si Fire Inspector Asraf Grar, chief opeation sa Cebu City Fire Station nagkanayon nga mopahigayon sila og safety inspection sa tanang mga sementeriyo aron masuta ang mga wirings nga mahimong hinungdan sa sunog.
Subay niini, si Padre Japheth Geonzon, parochial vicar sa Cebu Metropolitan Cathedral ug vice chairman sa Archdiocesan Commission on Worship nibutyag nga wala sila’y pasuga karon sa Carreta Cathedral nga ubos sa ilang parokya tungod sa gipatuman nga pagsirado niini sa publiko.
Matud ni Geonzon nga tungod sa covid-19 pandemics mao kini ang unang higayon nga masinati nga walay pasuga sa mga nitso nga maoy naandan sa katawhan
Sa laing bahin, sama sa ubang mga lugar siradohan usab sa kagamhanan sa Siyudad sa Naga ang ilang mga sementeriyo atol sa pagsaulog sa adlaw sa mga Santos ug kalag.
Ang pagsirado magsugod sa Oktubre 29 hangtud sa Nobiyembre 4, 2020.
Ang dakbayan adunay duha ka pribadong sementeryo ug upat ka pampubliko. –Rowena D. Capistrano ug Gabriel C. Bonjoc/BDB (BANATNEWS)
- Latest