Mga timbangan sa vendors sa Cebu City iparehistro

CEBU, Philippines — Ang Cebu City Market Operations Division uban sa City Treasurer’s Office nipahigayon og onsite registration sa mga timbangan.

Ang maong kalihukan aduna kini temang “Saktong Timbangan, Kaangayan sa Tanan”.

Ang MOD nihatag og serbisyo nga naglakip sa onsite registration, libreng educational seminar, coaching sa pagmentinar sa accurate weighing scales ubos sa Department of Science and Technology (DOST) standards.

Matud ni Irvin Cabales, market administrator sa siyudad nga adunay mga schedule alang sa pagpahigayon sa registration diin sugod kagahapon hangtud karong adlawa ang mga timbangan sa ambulant vendor sa Carbon Public Market maoy ipangrehistro.

Ang pagpangrehistro sa mga timbangan ipahigayon diha sa 3rd Unit sa Carbon Public Market.  Ang onsite registration hangtud kini sa Oktubre 9 ngadto sa 10, 2020 hinungdan nga giawhag ang tanan mga manindahay nga mosunod sa ilang mga gikatakda nga schedule.

Dugang ni Cabales nga ilang gipa-comply ang tanang vendors sa pagparehistro sa ilang mga timbangan diin nihatag sila og usa ka buwan nga moratorium ug human niana magsugod na dayon sila sa pagpanakop sa mga nakalapas o wala motuman sa balaod. /BDB (BANATNEWS)