MGB: Dolomites sa Alcoy legal ang pagbaligya

CEBU, Philippines — Gitug-an sa bag-ong hepe sa Mines and Geosciences Bureau (MGB-7) nga si Engineer Armando Malicse nga wala gibawalan ang mining firm sa Alcoy sa pag-extract ug pagbaligya og dolomites ngadto sa lokal nga mga kleyente.

Atol sa regular session sa hunta probinsyal kagahapon,si Malicse nipasabot nga mamahimo ra nga mokubkob ug mobaligya ang Dolomite Mining Corporation (DMC) ug dolomite basta nisubay kini sa Mineral Production Sharing Agreement (MPSA).

“The extraction of the Dolomite Mining Corporation as long as it is within the MPSA area bounded by a map, it is legal. And if they sell it to somebody, the contract says it’s legal, whether it is local or international” matod ni Malicse.

Gitataw ni Malicse nga wala nakabutang sa MPSA nga for export lang ang dolomites nga makobkob sa Alcoy.

Una niini gipadayag ni gobernador Gwendolyn Garcia nga gawas na sa MPSA ang pagkubkob sa dolomites didto sa Alcoy ug ibaligya sa lokal sanglit sa maong kasabotan,ang dolomites i-export sa gawas aron gamiton nga raw material pag gama og steel ug glass.

Si Malicse nagkanayon usab nga ang pag-transport sa dolomites gikan sa Alcoy padulong didto sa Manila Bay nisubay kini sa balaod.

Matod ni Malicse nga sa pagkuha og OTP, kinahanglan og di momenus duha ngadto sa tulo ka endorsement gikan sa local government unit (LGU). Mamahimong gikan sa lungsod o barangay o sa Probinsya.

Gumikan kay nakakuha man og OTP ang Philippine Mining Services Corporation (PMSC) nagtoo si Malicse nga naka-comply ang kompaniya.

Si bokal John Ismael Borgonia kinsa maoy chairman sa committee on environment conservation and natural resources sa provincial board nagkanayon nga angayan maapil gyud ang Probinsya sa Sugbo sa mapahibalo sa kuhaon nga minerales didto sa Alcoy.

“Murag man gud ang MGB, ‘sa amoa okay ra ni bahala na mo dinha ang Probinsya’ mura’g di sila motabang nato ba. sa atong nakita kinahanglan mopasar ta og ordinansa nga maghapnig ani,at least ang MGB although national government sila at least mo honor pud sila sa atoang power to tax. wala man gud nila gi-honor murag gipasagdan lang ta nila ba sa Probinsya” matod ni Borgonia. /MEL (BANATNEWS)