Basilica, Cebu City nangandam sa Pista Senyor
CEBU, Philippines — Bisan sa pandemiya, aduna gihapoy gihimong pagpangandam ang kagamhanan sa siyudad sa Sugbo ug sa Basilica Minore del Sto.Niño de Cebu kun unsay buhaton sa higayon nga magpadayon kining pandemiya atol sa kapistahan sa Balaang Bata karong Enero.
Si Cebu City Councilor Philip Zafra mibutyag sa Banat News nga gisugdan na nila ang pagpangandam kauban ang mga kaparian sa basilica kun unsay buhaton.
Si Zafra kinsa mao usab ang chairperson sa committee on public order nakigtigom na sa kadagkoan sa basilica sa miaging adlaw ug usa sa ilang nahisgotan ang novena nga dagsaon gyud og maayo ilabi na sa mga taga laing lugar.
Gidasig niya ang mga deboto nga taga laing lugar nga sa higayon nga magpadayon pa ang pandemiya karong Enero 2021, mas maayo dili lang una motikang dinhi sa Cebu City.
Gipaniguro ni Zafra nga higpit gyud ipatuman ang social distancing aron masiguro ang kaluwasan sa deboto.
Sa pagkakaron, 50% lang sa kapasidad sa mga simbahan ang gitugotang makasulod aron pagsimba.
Aron nga dili maputol ang tradisyon sa debotos nga gikan sa laing dapit, mohangyo siya kang Cebu Archbishop Jose Palma nga magdasig sa mga simbahan nga nahimutang sa Probinsya Sugbo nga mogahin og oras sa pagdalit og livestreaming sa ilang mga parokya sa novena mass nga nanukad sa basilica.
Samtang kun magpadayon gihapon ang pandemiya dili na madayon ang solemn nga prosisyon matag bisperas ug himoon nalang kini pinaagi sa motorkada.
Sa maong pamaagi, mas motaas ang rota nga maagian sa imahe sa Balaang Bata. Dugang pa ni Zafra nga nagplano usab sila nga isuroy sa nagkadaiyang dapit sa probinsya ang imahe.
“Atong gihan-ay daan kay basin naa pa ang pandemya anang panahona. Apan kung ma-okay na ang panahon, mobalik gyud ta sa atong mga naandan nga kalihokan,” suma pa ni Zafra. /IBM (BANATNEWS)
- Latest