Tulo patay sa pagpamusil

CEBU, Philippines — Patay ang usa ka engineer ug ang iyang anak samtang German national nga ilang silingan grabeng naangol human silang tulo gipusil sa ila rang silingan diha sa Sitio Kintolimbo, Upper Calajo-an, lungsod sa Minglanilla niadtong Biyernes sa gabii, ang suspek napatay sab sa mga mirespondeng polis.

Ang mga namatay mao si Engr. Roberto Llanillo, 53 ,ug anak nga si Malbert Llanillo, 26, ug ang suspek nga si Edwin Ferguson,32. Samtang padayong nagpaalim sa tambalanan ang German national nga si Christian Metz, 35.

Si Police Chief Master Sergeant Ronjie Lopez sa Minglanilla Police Station nagkanayon nga pulos nag-abang ang mga biktima ug ang suspek sa lugar.

Nagtapok ang mga biktima sa gawas sa ilang giabangang kwarto dihang kalit naabot ang suspetsado.

Matud pang Lopez dunay panaglalis nga nahitabo sa grupo apan gihangyo sa amahang Llanillo ang suspek nga mosulod nalang sa ilang kwarto. Gikatahong giagbayan sa naulahi ang suspek apan niatras kini ug nibunot sa og armas gikan sa hawak dayon pusil sa engineer. Pagkakita sa anak ug sa langyaw dali nilang gitabangan ang biktima apan hasta sila gipamusil sab ni Ferguson.

Patay diha-diha ang engineer human nakaangkon og samad pinusilan sa iyang ulo samtang ang anak niini namatay sa tambalanan. Samtang padayon pa nga giatiman ang langyaw sa tambalanan.

Matud pa ni Lopez nga susama og walay intensyon nga mamusil pa og laing tawo ang suspek suma pa sa estorya sa ubang mga tawo sa lugar tungod kay human sa hitabo misud kini sa iyang lawak ug nanirado.

Gisuwayan og hangyo sa mga polis ang suspek nga motahan sa iyang kaugalingon apan nagmagahi kini.

Tungod niini, napugos ang mga otoridad pagsulod sa lawak sa suspek apan gikatahong nisuway kini pagpusil sa mga polis hinungdan nga kini napusilan. Gidala sa tambalanan ang suspek apan nakabsan sab kini sa iyang kinabuhi.

Diha sa crime scene nakuha ang usa ka .38 nga revolver nga maoy giingong gigamit sa suspek sa pagpusil sa mga biktima ug sa mga polis.

Si Lopez nagkanayon nga daw napungot na ang suspek gumikan sa mga pasingit nga iyang naangkon.  Apan dili pa makatumbok ang kapulisan kung kinsa gyud ang gikalagotan sa suspetsado. /IBM (BANATNEWS)