Piyansadora nakuhaan og P2.7 milyones shabu

CEBU, Philippines — Wala katoo ang piyansadora kay polis diay ang iyang gikatransaksyon nga mipalit kaniya og shabu sa dihang kalit siyang gidakop sa mga sakop sa Station Drug Enforcement Unit sa Labangon Police Station pinangulohan ni Police Captain Jonathan Dela Cerna alas 2:00 Sabado sa kaadlawon diha sa Caimito St., Barangay Punta Princesa  sa Siyudad sa Sugbo.

Ang dinakpan mao si Elizabeth Asintista Flores, 57, gikonsiderar nga high value individual Regional Level ug anaa sa drug watchlist nga nagpuyo sa Sitio Kahuyan Brgy. Mambaling ning siyudad.

“Nagmahay gyud ko. Nadani gyud ko ani pagpamaligya tungod sa pandemiya. Nag sugod ko pamaligya niadtong bulan sa Mayo wala ko magtoo nga pulis na diay ako gikatransaksyon siguro mao ni kabubot-on sa Ginoo nga madakpan ko dako kaayo ako pag mahay,” sigon ni Flores.

Atol sa operasyon nakuha gikan kaniya ang nagkadaiyang putos sa gituohang shabu nga motimbang og 405 gramos nga mobalor P2,754,000.00.

Ang dinakpan anaa karon sa Labangon Police Station pasakaan og kasong kalapaaan sa Sec.5 Sec11 Art2 RA9165.

Samtang nadakpan sab ug nakuhaan og P680 mil nga balor sa gidudahang shabu ang usa construction site supervisor sa mga sakop sa Philippine Drug Enforcement Agency -7 sa ilang operasyon diha sa Sitio Kalubihan, Barangay Guadalupe ning Dakbayan sa Sugbo niadtong Biyernes sa hapon. Ang nasikop mao si Jose Roel Joven Ermitanio, 35,residente sa maong lugar.

Nasakmit kang Ermintanio ang pinutos sa ginadili nga  gituohang shabu nga   motimbang og 100 gramos ug mobalor og P680 mil base sa Dangerous Drug Board Value, buy bust money, motor ug uban pa.

Ang dinakpan base sa kasayuran nga nakaylap sa PDEA7 mobaligya ra kini sa iyang mga kaila ug makabaligya kini og usa ka kilong shabu kada semana.

Ang mga dinakpan gikatakdang pasakaan og kalapasan sa Sections 5 and 11 Article II of RA 9165. —Rowena D. Capistrano/IBM (BANATNEWS)