Tambalanan andam makig- diyalogo sa mga Garcia

CEBU, Philippines — Mitingog na ang pribadong tambalanan human sa pangutana sa pamilyang Garcia kun unsay nahitabo sa ilang mga igsuong sila kanhi Dumanjug Mayor Nelson Garcia ug Barili Mayor Marlon Garcia nga parehong nangamatay diha sa ilang pasilidad.

Bisan wala hinganli nilang Cebu Gov. Gwendolyn Garcia ug Kongresista Pablo John Garcia ang maong tambalanan sa ilang emosyonal nga press conference, ang Chong Hua Hospital sa Cebu City miingon nga bisag wa sila hinganli, nanggawas na sa mga unang mga balita nga diha sa ilang tambalanan gidala ang managsuong opisyal.

Ang CHH nagkanayon nga andam sila maki-dayalogo sa pamilyang Garcia ug motubag sa mga pangutana sa pamilya.

“We are ready to dialogue with them, and provide any answers that may help them in their search for closure,” sumala sa Chong Hua Hospital.

Sa ilang pamahayag, ang maong hospital nagkanayon nga ang ilang medical team mohatag lang og pinakamaayo nga practices pagatiman sa ilang mga pasyente.

“The judgments of the medical team are backed by their extensive training and experience as doctors and medical practitioners, and based on verified data,” matud sa CHH.

“Their actions are consistent with globally-accepted and clinically-established procedures applicable to the patient’s diagnoses. In particular the two attending physicians of the Garcia brothers are reputable and outstanding doctors, and are specialists in their fields,” dugang pa sa maong hospital.

Si Mayor Marlon ug Nelson, pareho kining natakdan sa coronavirus disease (Covid-19) ug na-admit sa maong tambalanan, apan naka-recover ra hinoon gikan sa virus apan wala sila gipapauli.

Butang nga wala masabti ug gikwestyon sa mga Garcia kun unsay rason ilabi na ang usa sa mga pasyente nabalaka sa pagsaka sa ilang hospital bills.

Apan niadtong Septiyembre 1 namatay si Nelson ug lima ka adlaw ang nilabay nisunod og taliwan si Marlon.

Si Nelson namatay tungod sa pulmonary arrest secondary to probable pulmonary embolism samtang si Marlon namatay og septic shock secondary catheter related blood stream infection, ventilator associated pneumonia.

Ang CHH nipadangat usab og pahasubo ngadto sa pamilyang Garcia. /IBM (BANATNEWS)