Traditional PUJs tabangan
CEBU, Philippines — Plano ni Cebu City Councilor James Cuenco nga matabangan ang mga drayber sa tradisyonal nga PUJ nga makabalik sa pagpamasada.
Si Cuenco maoy gitahasan nga mangulo sa task force nga maoy moabag sa pagpangita og kasulbaran sa taod-taod na nga yangungo sa mga drayber. Ipadangat nila ang ilang katuyoan ngadto sa Land Transportation Franchising and Regulatory Board (LTFRB).
Nasayran nga sukad gipaubos sa community quarantine ang mga dapit sa nasud lakip ang siyudad sa Sugbo gipahunong ang pagbiyahe sa mga PUJs.
Ang mga modernong PUJs nalang ug mga bus maoy gitugotan nga makapamasahero apan higpit ang gipatumang health protocols.
Una na nga gibutyag sa LTFRB-7 nga paigo ra ang gidaghanon sa bus nga nagbiyahe karon sa dakbayan maong dili pa tugotan makabalik ang mga tradisyonal nga PUJs.
Si Cuenco miingon nga aron makombinsir ang LTFRB kinahanglang sundon sa mga operators ug drivers ang mga lagda ug rekisitos.
Pipila sa ilang proposal pagkumbinser sa LTFRB mao ang pagpatuman og Motor Vehicle Inspection sa matag sakyanan, baga ang ligid nga gamiton, kompleto ang mga suga sa unit, butangan og barriers, ug walay pending nga violation sulod sa usa ka tuig.
Kinahanglan usab ang pagtuman sa no loading ug unloading policy. Nalakip usab sa proposal ang pagpaubos sa swab test sa mga driver nga gastohan sa gobyerno.
Nagplano usab ang kagamhanan nga mohatag og 10 ka litro nga gasolina matag unit.
Sa higayon nga mahatagan og katumanan ang maong plano , butangan og stickers ang matag unit sa jeep nga maoy timailhan sa mga sakop sa Cebu City Transportation Office nga pasado kini nga makabiyahe. /IBM (BANATNEWS)
- Latest