Tulo ka adlaw nga liquor ban ipatuman sa Danao
CEBU, Philippines — Mopatuman og tulo ka adlaw nga liquor ban ang Siyudad sa Danao sugod Septiyembre 19 hangtud sa 21, 2020.
Pasabot niini nga walay tugotan nga mga tindahan ug establisememto nga mobaligya og ilimnong makahubog ug gidili usab ang pag-inom diha sa mga pampubliko nga lugar sa siyudad.
“Considering that the upcoming home fiesta celebrations come this 21st of this month, the possibility of alcohol intoxication is very likely to happen where close contact with other people is a practice during drinking sessions”, tipik sa Executive Order No. 47 sa siyudad. Base usab sa post sa facebook page sa kagamhanan sa siyudad nga bisan pa og na-flattened na ang curve sa COVD-19 sa siyudad padayon gihapon ang lakang aron dili mokatap ang virus.
“Adunay dakong posibilidad nga tungod sa pagsaulog sa kapistahan adunay mag-inom ug mahubog gikan sa ilimnong makahubog. Kung mahitabo kini dako sab ang posibilidad sa panagsikitay o close contact. Dili na mahinumduman ang health protocols”, tipik sa post diha sa facebook page sa siyudad.
Ang Dakbayan sa Danao adunay 38 ka aktibo nga kaso sa COVID-19 gikan sa 289 ka cumulative total diin 217 na ang naka-recover sa virus ug 19 ang namatay.
Gi-discourage usab ang pag-imbetar og mga bisita gikan sa laing siyudad o lungsod. /BDB (BANATNEWS)
- Latest
