VECO nipasabot sa konseho sa Cebu City

CEBU, Philippines — Ang mga representante sa Visayan Electric Company (VECO) nipasabot kagahapon sa konseho sa Dakbayan sa Sugbo kalabot sa reklamo sa pipila ka mga konsumidor kabahin sa pagsaka sa ilang bayranan sa kuryente sukad sa pagpaubos sa siyudad sa community quarantine.

Matud ni Konsehal Nestor Archieval nga daghan silang nadawat nga reklamo kabahin niini.

Matud sa assistant vice president sa customer service sa VECO Mark Anthony Kindica nga duna sila’y gihimo nga estimated bill.

Samtang si Quennie Bronce, tigpamaba sa VECO nagkanayon nga ang basehan sa estimated nga bill mao ang nangaging tulo ka buwan sa wala pa nagsugod ang lockdown.

“Adto sad mopili sa pinakagamay nga bill”, matud ni Bronce.

Ang maong lakang ubos kini sa advisory sa Energy Regulatory Commission diin mohimo una og estimated nga bill alang sa mga lugar nga gi-lockdown ug maglisod og sulod ang meter readers.

“Kasagaran pod sa nireklamo kay kadtong dunay daan nga bills nga wala nabayran. Usa nga sa rason nga nidako ang ilang bayranan”, dugang ni Bronce. /BDB (BANATNEWS)