Mga programa ni Robredo gihangop sa Cebu City

CEBU, Philippines — Nipalabang kagahapon og resolusyon ang konseho sa Dakbayan sa Sugbo alang sa pagtimbaya kang Bise Presidente Leni Robredo gumikan sa natampo niini nga mga programa dinhi sa Sugbo partikular niini ang kampaniya sa pakigbatok sa COVID-19.

Si Jessica Resch, presidente sa Sangguniang Kabataan-Cebu City nagkanayon nga niila gyud ang bise presidente sa katakos sa kabatan-onan nga maoy nagsilbing volunteers sa mga programa niini.

Matud ni Resch nga nag-apod-apod si Robredo og mga pagkaon ug uban pa nga panginahanglanon sa frontliners sama sa personal protective equipment (PPE) ug medical supplies.

Niabag usab kini sa mga programa sa SK diha sa nagkadaiyang barangay pinaagi sa programa niini nga “Angat Buhay Project”.

Gihangop usab ang “Libreng Sakay” alang sa frontliners diin liboan ang nakabenipisyo niini. /BDB (BANATNEWS)