9 ka deacons ordinahan karon sa pagkapari

CEBU, Philippines — Siyam ka deacons sa Archdiocese of Cebu ang ordinahan sa pagkapari karong adlawa sa alas 9:00 sa buntag diha sa Cebu Metropolitan Cathedral nga mabati usab sa DyRF1215 nga estosyon sa radyo kinsa partner sa simbahan.

Ang nahisgutang deacons nga ordinahan pagkapari mao sila si Reverend Leo Lou Arche; Reverend Kenneth Arong; Reverend Christian James Mayol; Reverend Julbie Camay; Reverend Rogel Murillo; Reverend Jonas Yap; Reverend Christopher Carl Ompad; Reverend Gilbert Ytang ug Reverend Rommel Rey Rosil.

Ang ordinasyon pangulohan ni Arsobispo Jose Palma uban sa pipila ka mga kaparian sa Archdiocese of Cebu.

Si Yap sa iyang bahin, nibutyag nga taliwala sa gisagubang nga pandemiya dako kaayo ang iyang pasalamat sa Ginoo tungod kay gipadayag niini ang iyang pagka manggihatagon ug lakip usab ang pagpadayag niya sa dakong gugma diha kaniya ug sa katawhan.

Matud ni Yap nga karong adlawa madawat na nila ang gasa sa pagkapari ug timailhan kini nga ang Ginoo kanunay nga nag-uban kanatong tanan ug kini naglakaw usab uban sa iyang katawhan bisan sa kalisod sa panahon nga nasinati karon.

Ang Cebu Metropolitan Cathedral padayon kining mosunod sa tanang gipatuman nga health protocols sa pakigbatok sa COVID-19.  /BDB (BANATNEWS)