Bagyong Leon maoy hinungdan

CEBU, Philippines — Ang bagyong Leon maoy hinungdan sa mga nasinating pagbaha ug mga pagdahili sa yuta nga nakaapektar sa mga siyudad sa Sugbo, Mandaue ug Lapu-Lapu sugod pa niadtong adlaw nga Martes.

Matud pa ni PAGASA-Visayas weather specialist 1 Netherlen Delfin sugod pa niadtong Septiyembre 13 hangtud 16 kaning maong mga lugar naapektahan sa grabeng pag-uwan tungod gibira ug gipakusog sa bagyong Leon ang southwest moonson o hanging Habagat sa tibuok Visayas.

Sumala pang Delfin ang uwan kagahapong adlawa Septiyembre 16, 2020 base sa ilang 24-hour data moabot og 34 milimetro o 170,000 ka baril.

Nagsugod ang grabeng pagbunok niini alas- 8 sa gabii hangtud alas- 9 gabii dayon nibalik alas- 10 sa gabii hangtud alas 10:30 sa gabii. Subling nibunok ang uwan 1:40 sa kaadlawon hangtud alas 2:10 sa kaadlawon pagka-adlaw nga Miyerkules.

Matud pa niya, kun tigumon ang uwan sugod Septiyembre 1 hangtud Septiyembre 15 moabot na kini og 40 porsiyento sa gipaabot nga 192.1 millimeter nga paguwan karong buwana.

Ang bagyong Leon nga dunay international name nga Noul maoy ika-12 nga bagyo nga nisud sa Pilipinas karong tuiga ug kini nag—irog karon sa West Philippine Sea.

Kataposan kining nasigpatan 225 kilometro sa kasadpang amihanang-kasadpan sa Coron, Palawan ug nagdala og 65 km per hour nga hangin ug haguros nga 80 kph ug nag-irog sa kasadpang amihanan-kasadpan sa gipaspason nga 10 kph.

Ang bagyong Leon  gipaabot nga mogawas sa Philippines Area of Responsibility karong adlawa Septiyembre 17.

Ang Sugbo makasinati og hayag nga kalangita karong adlaw nga Biyernes  hangtud sa Sabado ug Domingo, apan duna gihapoy panagsa ug daklit nga mga paguwan ug mapanganurong kalangitan matud pang Delfin. The Freeman/IBM