BFAR higpit gihapon sa pagpatuman sa mandato

Cebu, Philippines — Ang Bureau of Fisheries and Aquatic Resources (BFAR)-7 higpit gihapon kining nipatuman sa mandato sa balaod bisan sa hulga sa COVID-19 pandemic.

Matud ni Josefina Flores, hepe sa Fisheries Management Regulatory and Enforcement Division nga padayon ang ilang gihimo nga mga hiniusa nga operasyon uban sa mga partner nga mga ahensiya sa gobiyerno batok sa mga malapasayon sa balaod.

Gibutyag ni Flores nga gikan sa buwan sa Enero hangtud niining buwana aduna sila’y walo ka commercial fishing boats ug adunay gamay nga panagatan ang ilang nadakpan, 22 ka mga administrative ug criminal cases ang ilang napasaka batok sa ilang mga nadakpan ug nakakolekta usab sila og mga multa sa mga malapason.

Gibutyag usab ni Flores nga niining tuiga wala pa sila’y natala nga nakonbikto sa mga gipasakaan nila og kaso.

Giawhag sa BFAR-7 ang mga Local Government Unit ug komunidad nga padayon sa pagtabang sa pagbantay sa mga tawo nga nihimo og mga ilegal nga binuhatan diha sa kadagatan aron mapreserba ang kinaiyahan sa umaabot pa nga mga henerasyon ug magmakanunayon usab ang abot sa kadagatan. (BANAT NEWS)