30 ka tawo nakalapas sa health protocols nasikop

CEBU, Philippines — Niabot ngadto sa 30 ka tawo ang gidakop sa kapolisan sa Lungsod sa Minglanilla tungod kay nakahimo kini og kalapasan sa quarantine protocols niadtong Domingo sa gabii.

Si Police Major William Homoc, hepe sa Minglanilla Police Station ang nangulo sa kinalit nga operasyon diha sa Barangay Cadulawan sa maong lungsod atol sa nahisgutang adlaw.

Ang kapolisan sa lungsod nakadawat kini og mga report gikan sa mga molupyo kabahin sa mga tawo nga mosuroy diha sa ilang dapit.

Bisan sa gipatuman nga kamandoan sa gobiyerno nga magpundo sa mga panimalay kong walay importanteng tuyo o lakwon diin lakip kini sa health protocols paglikay sa COVID-19 giingong daghan ang mosuroy, mag-date, mangaon ug mag-estambay diha sa lugar.

Ang Lungsod sa Minglanilla lakip sa gipaubos nga modified general community quarantine (MGCQ).

Sa laing bahin, Giklaro ni Gobernador Gwendolyn Garcia nga dili pa makasuroy ang mga residente sa Siyudad sa Sugbo ngadto sa tourism sites sa Probinsiya sa Sugbo bisan og pareho na ang quarantine classification sa Cebu City ug Probinsiya sa Sugbo.

Matud ni Garcia nga konsultahon una niya ang mga mayor sa 44 ka lungsod ug unom ka component cities sa probinsiya.

Gilikayan sa Kapitolyo nga mausab ang nahtiabo niadotng bulan sa Hunyo nga nisaka ang kaso sa COVID-19 sa mga lungsod ug dakbayan sa probinsiya dihang gibuksan sa probinsiya ang border niini sa Siyudad sa Sugbo.

Sukad nga napaubos na sa MGCQ niadtong buwan sa Agosto gibuksan na usab ang tourism industry human sa pipila ka bulan nga community quarantine.

Ang Siyudad sa Sugbo napaubos kini sa MGCQ niadtong Septiyembre 1, 2020. – Le Phyllis F. Antojado/BDB (BANATNEWS)