Mga negosyanteng Muslim sa Talisay nihangyong makabalik og tinda

CEBU, Philippines — Ang grupo sa mga negosyanteng Muslim sa Dakbayan sa Talisay nanghinaot nga unta makabalik na sila sa pagpaninda tungod kay apektao usab sila sa pandemiya.

Ang maong grupo nipaabot sa ilang hangyo ngadto kang Police Colonel Alladin Collado, direktor sa Cebu Provincial Police Office (CPPO) atol sa ilang diyalogo niadtong Domingo nga gipahigayon diha sa basketball gym sa Barangay Tabunok.

Ang maong hangyo sa mga negosyanteng Muslim giduso ni Collado ngadto kang Police Major Gerard Ace Pelare, hepe sa Talisay City Police Station diin ipaabot usab niya kini ngadto kang Mayor Gerald Anthony “Samsam” Gullas Jr.

Si Collado nanghinaot nga unta magpermanente ang ilang relasyon tali sa nagkalainlaing sektor ilabi na sa Muslim community.

Samtang si Pelare nibutyag nga ang Muslim community nga nagpuyo diha sa Barangay Tabunok maoy usa sa mga dakong tabang sa kapolisan labot sa pagdakop sa pipila ka mga drug personalities ug uban pa nga mga kriminal.

Gipanghinaot usab ni Pelare nga ang ilang relasyon magpadayon aron pabilin nga hapsay ug malinawon ang siyudad. / BDB (BANATNEWS)