Online appointment ipatuman sa COMELEC

CEBU, Philippines — Nunot sa hinayhinay na sab pagdagsa sa mga tawong buot magparehistro diha sa Comelec ug hugot nga pagtuman sa gitawag nga “new normal” nunot sa pandemiya sa COVID-19, midangop ang maong buhatan sa online appointment sa mga tawo.

Matud ni Atty. Lionel Marco Castillano, Provincial Election Supervisor,  ang COMELEC en banc midesisyon nga kadto lang mga lugar nga daghang kaso sa COVID-19 ug ang Inter-Agency Task Force moingon nagdili una sa Comelec makapangrehistro maoy ilang tumanon. Ang en banc nituki bag-ohay lang sa suwat sa mga mayor sa Metro Manila nga naghangyong hunongon una ang registration, samtang gisuportahan kini sa ilang chairman, ang mayoriya wala.

Tungod niini, Comelec Cebu  mipatuman og pamaagi aron dili magdasok ang mga magpa-rehistro, ang gustong magparehisyo o dunay tuyo sa ilang buhatan kinahanglang moagi una sa online appointment.

Matud ni Castillano kinahanglan nila kining ipatuman tungod daghan sa ilang mga sangang opisina dili pa andam nga ipatuman ang gitawag new normal.

Sama Lapu-Lapu ug Cebu City, ang ilang mga buhatan wala’y lugar aron didto maghuwat ang mga kliyente. Gisuwayan nila og akomodar ang mga walk-ins apan dili gyud malikayan nga magtapok ang mga tawo.

Ning panahona prayoridad nila ang pag—obserbar sa minimum health protocols ug dili ang gidaghanon sa mga tawo nga ilang maserbisyuhan.

Sigon ni Castillano diha sa Cebu City sagad sa mga kliyente nila magkuha og voter’s certificate kun moakomodar sila og walk-ins magtapok sila sa gawas. Bisan unsaon pa og badlong mobalik ra gihapon sa pagtapok hinungdan nga nakita gyud nila nga maglisod sila sa pagpatuman sa social distancing.

“That’s why I issued an order nga strictly follow na gyud ang online appointments on matter of registration and issuance of voter’s certification diha sa Cebu City kay kung imong tan-awon delikado gyud we don’t want to be a venue for transmission of COVID just like what happen to kay madelikado man gud ang panlawas sa amoang mga empleyado ug labaw na sa mga kliyente so lisod kaayo nga mo surge ang positive cases just because our office did not implement the minimum health protocols,” sigon ni Castillano.

Awhag nila sa katawhan nga dunay tuyo sa ilang mga buhatan nga ipaagi kini sa online transaction pinaagi sa Facebook.

Giklaro ni Castillano dili nila tuyo nga lisud-lisuron ang mga tawo apan alang kini sa kaayuhan sa tanan kay bisan og na-flattened na ang curve apan ang virus nagpabilin gihapon. Gihangyo niya ang uban nga kung mahimo ug kun dili gyud kaayo importante nga magparehistro, likayan lang una ang paghikay niini karong duna pay pandemiya.

“So hopefully magsinabtanay ta dili pud nato angay ikahadlok kay usa ka tuig pa ang pagpangrehistro sa Commission taman pa ni September next year so if ever there is no immediate need for you nga magparehistro I strongly advise nga ikuan lang sa i-defer lang sa ninyo for next year until such time safety na inyong paggawas,” hangyo ni Castillano. /IBM (BANATNEWS)