Oponganon hatagan og face mask ug alcohol

CEBU, Philippines — Gitinguha karon sa kagamhanan sa Dakbayan  sa Lapu- Lapu ang pagpanghatag og face mask, alcohol ug uban pang kagamitan pagbatok sa COVID-19 ngadto sa mga kabus nga Oponganon.

Si Cindy King Chan, chairperson sa Lapu-Lapu City Tourism Cultural and Historical Affairs Commission (TCHAC) nibutyag nga nakadawat ang kagamhanan sa Dakbayan sa  Lapu-Lapu og donasyon nga kinarton nga mga panapton gikan sa Sangri-La Mactan Resort and Spa nga nahimutang usab sa maong dakbayan.

Matud ni Chan nga ang maong mga panapton nga gidonar  ilang  gitugyan ngadto sa buhatan sa  Human Development Training Center  (HDTC)  isip materyales sa himuong mga washable face mask.

Samtang si Kim Francisco, pangulo sa Public Employment Service Office (PESO) sa siyudad maoy gitahasan sa pagtahi sa matag semana og liboan ka washable mask.

Natigayon kini ubos sa gipasiugdahan nga programa sa nahisgotang lokal nga kagamhanan ubos usab sa “Linens for Life” face mask program diin tinguha niini nga ang 10,000 ka kabus nga Oponganon mahatagan og face mask.

 Gihingusgan sa lokal nga kagamhanan sa Dakbayan sa Lapu-Lapu ang pagpatuman sa minimum health protocol subay sa ordinansa nga giluwatan ni Mayor Junard  Ahong Chan.

Naglakip sa mga health protocol mao ang pagsul-ob og face mask ug social distancing.

Ang mga madakpan nga napakyas sa pagtuman sa health protocols makabayad og multa isip silot nga gipahamtang.

Gipahinumdoman usab kanunay ni Chan ang mga Oponganon sa pagpanghunaw gamit ang tubig ug sabon o alcohol sa paglikay sa COVID-19. /BDB (BANATNEWS)