BICs, cluster clinics sa Cebu City gikuhaan

CEBU, Philippines — Giiban-ibanan na ang gidaghanon sa mga Barangay Isolation Centers ug cluster clinics sa Cebu City nunot sa padayong pagkubos sa gidaghanon sa mga bag-ong kaso sa novel coronavirus disease (COVID-19) sa siyudad.

Sa pagsugod sa pandemiya niadtong bulan sa Marso, ang siyudad mitagana sa 52 ka mga tunghaan ug gihimong mga BIC aron maoy butangan sa mga magpositibo sa COVID-19 nga mga asymptomatic o kadtong walay mga sintomas aron dili na sila makapanakod sa ilang silingan.

Apan karon upat nalang ka buok ang nagbiling BICs, tagduha gikan sa South ug North Districts.

Sa pagkakaron ang dakbayan nakatala og 618 active cases nalang ug ang 235 niini ang naa sa mga tambalanan samtang 383 ang gibutang sa mga isolation sumala pa sa talaan sa Department of Health Central Visayas Center for Health Development’s niatong Agosto 29.

Ang North District cluster mao ang City Central ug Zapatera Elementary School samtang sa South District mao ang Mambaling ug Vicente Rama Memorial National High School.

Si IATF Emergency Operations Center’s Deputy Chief implementer Konsehal Joel Garganera miingon nga plano nilang tagsa nalang ka BIC ug cluster clinic ang ipabilin sa kada distrito kun mokubos pa gyud og maayo ang gidaghanon sa mga natakboyan.

Gawas sa mga BICs nga unang gibutangan sa mga positibo, nagamit na sab ang gitukod sa siyudad nga NOAH Complex, duha ka Bayanihan Field Centers nga mao ang Sacred Heath School for Boys ug ang IEC. Kaning duha aduna lang 21 ka mga tawong giatiman.

Samtang duha ka mga tunghaan sab ang gipabiling reserba alang sa mga locally stranded individuals nga walay kapuy-an dinhi apan kinahanglang i-isolate sud sa 14 ka adlaw. Samtang ang Cebu City Quarantine Center gihimo na karong hospital level facility.

Si City Health Department officer-in-charge, Dr. Jeffrey Ibones mitug-an sa The Freeman, igsuong pamantalaan sa Banat News nga gawas sa BICs, ilaha na sab gipuhalan ang gidaghanon sa mga cluster clinics sa duh aka distrito. Gipabilin ang cluster clinic sa North District diha sa Cebu Medical Society sa Banilad  samtang ang Cebu City Sports Institute sab diha sa Brgy. San Nicolas Proper ang sa South District.  The Freeman/IBM