Duha ka durugista sa Cebu City nasikop
CEBU, Philippines — Usa ka 32-anyos nga suspetsadong drug pusher ang nasikop atol sa gipahigayong buy bust operation sa City Intelligence Unit (CIU) sa Cebu City Police Office (CCPO) pinangulohan ni Police Major Randy Caballes kagahapon sa hapon diha sa Barangay Pahina Central, Dakbayan sa Sugbo.
Ang suspetsado giila sa kapolisan nga si Jonarie Quijada Sarasad, residente sa maong dapit.
Nasakmit sa kapolisan gikan sa suspetsado ang 17 ka gramong shabu nga nibalor ngadto sa P115,600 ug usa ka kalibre .38 revolver nga adunay tulo ka bala.
Ang suspetsado natingkagol karon diha sa detention cell sa CCPO ug gikatakdang pasakaan og kasong kalapasan sa Section 5 ug Section 11 Article II sa Akta Republika 9165 kun “Comprehensive Dangerous Drugs Act og 2002” ug Akta Republika 10591 kun “Comprehensive Firearms and Ammunition Regulation Act”.
Sa laing bahin, nikabat ngadto sa P340 mil ang balor sa ginadiling drugas ang nasakmit sa Philippine Drug Enforcement Agency (PDEA)-7 Special Enforcement Team gikan sa suspetsadong pusher niadtong Biyernes sa hapon diha sa Riva Ridge Subdivision, Barangay Tisa, Dakbayan sa Sugbo.
Ang suspetsado mao si Rodolfo Babaw, 53-anyos, ulitawo, walay trabaho ug residente sa maong lugar.
Nasakmit gikan sa suspetsado ang unom ka putos nga shabu nga nitimbang ngadto sa 50 ka gramo ug nibalor tanan sa P340 mil ka pesos ug buy bust money.
Giingong ang suspetsdo maka-dispose kini og 50 ka gramong ginadiling drugas matag semana. Rowena D. Capistrano/BDB (BANATNEWS)
- Latest