DOH: Kaso sa dengue nikunhod
CEBU, Philippines — Ang Department of Health (DOH) nakatala og ubos nga kaso sa dengue sa unang tunga nga bahin sa tuig 2020.
Si Dr. Mary Jean Loreche, tigpamaba sa DOH-7 nitug-an nga gikan niadtong Enero 1 hangtud sa Agosto 22, 2020 nikunhod ngadto sa 14.16 porsyento nga kaso sa dengue base sa ilang record.
Matud ni Loreche nga sa maong mga buwan nakatala sila og 9,688 ka kaso sa dengue diin 37 niini ang nakalas.
Ug ang maong gidaghanon mas ubos kini ikomparar sa ilang na record sa mao gihapon nga mga buwan niadtong tuig 2019 diin adunay 16, 467 ka kaso ug 69 ang patay.
Si Loreche nagkanayon nga nagtuo sila nga tungod sa pagpundo sa mga bata sa ilang mga balay tungod sa COVID-19 ang hinungdan sa pagkunhod sa kaso sa dengue.
Ang DOH-7 walay hunong sa pag-awhag sa mga ginikanan nga padayon gihapon ang pagpanglimpyo sa ilang panimalay ug dili magpundo og mga tubig nga posibleng maitlogan sa mga lamok nga nagdala og sakit nga dengue. /BDB (BANATNEWS)
- Latest
