Sistema sa SSS, hinay nga koneksyon sa internet gireklamo

CEBU, Philippines — Gidagsa sa katawhan ang buhatan sa SSS nga nahimutang sa usa ka mall diha sa Tabunok, Dakbayan sa Talisay.

Gireklamo sa mga tawo nga way sistema ang SSS nga nakamugna og kaguliyang ug wa na matuman ang social distancing.

Si Jose (dili tinuod nga pangan) nagkanayon nga walay sistema ang ilang paagi sa pag atubang sa mga tawo samtang sila nipatuman og no face to face transaction.

Ang gwardya ra ang mo-estorya sa tuyo sa mga tawo nga naa lang sa gawas ug kini na ang mo-relay sa mensahe ngadto sa mga empleyado.

Ang mall magbukas sa alas 8 sa buntag apan ang SSS moabli og alas 9 nga sugaton sa bagang duot sa katawhan nga alas sayes pa sa buntag naglinya na.

Gireklamo usab ang gihatag nga website sa SSS nga lisud sudlan hinungdan nga nagtapok ang katawhan diha sa ilang buhatan sa Tabunok.

Connection sa internet

Samtang sa laing bahin nakadawat og daghang reklamo si Mayor Gerald Anthony “Samsam” Gullas Jr. kabahin sa problema sa internet connection diha sa Talisay.

Matud pa sa mayor nga nagsugod ang mga reklamo human nga nibuto ang transformer ug nasunog ang linya hinungdan sa pagbrownout.

Apan sa dihang giayo na sa VECO ang problema aduna gihapon nitumaw nga reklamo bahin sa koneksyon sa internet.

Nagkanayon si Mayor Gullas nga karon unta gikinahanglan ang maayong koneksyon sa internet tungod kay sagad sa mga tawo ang nag-trabaho sa ilang mga panimay samtang ang ubang mga estudyante nagsugod na sa online nga klase. —/MEL (BANAT NEWS)