Viaduct temporaryong isirado karon ug ugma

CEBU, Philippines — Sugod karong adlawa hangtud ugma temporaryong siradohan ang viaduct diha sa South Road Properties (SRP) ang pagsirado iatol kini sa gabii ngadto sa buntag.

Kini ang gipahibalo ni John Paul Amores, public information officer sa communications and electronics sa Cebu City Transportation Office (CCTO) nga nahinabi sa Banat News.

Matud ni Amores nga nausab ang schedule sa closure sa viaduct diin ipahigayon kini karong adlawa hangtud ugma sa alas 11:00 sa gabii hangtud sa alas 5:00 sa kadlawon

Ang naandan nga schedule sa pagsirado sa viaduct alas 8:00 sa buntag ngadto sa alas 6:00 sa gabii.

Si Amores nagkanayon nga giusab ang schedule aron dili kini makaapekto sa dagan sa trapiko sa pagtrabaho sa CCLEX.

Giawhag sa CCTO ang mga motorista nga mo-divert diha sa dalan F. Vestil Street, N. Bacalso paingon sa north samtang ang paingon sa south moagi diha sa Osmeña Boulevard ngadto sa N. Bacalso Avenue.

Ang CCTO malaumon nga mosunod ang mga motorista sa gipahibalo nila nga schedule aron dili mabalda ang ilang mga lakaw. —/BDB (BANAT NEWS)