Most wanted nasikop sa Consolacion
CEBU, Philippines — Nasikop sa hiniusang operasyon sa Provincial Intelligence Unit (PIU) sa Cebu Provincial Police Office (CPPO), Consolacion Police Station ug Compostela Police Station ang number 2 most wanted person diha sa Tayud lungsod sa Consolacion
Si Police Lieutenant Colonel Randy Koret team lider sa kapolisan sa PIU sa CPPO miila sa dinakpan nga mao si Adbul Bashit Badio Diampuan, 22 anyos suspetsado sa pagpatay sa usa ka tinun-an sa criminology. Ang warrant of arrest batok kang Diampuan giluwatan ni Judge Fruto Teodorico III sa Regional Trial Court (RTC) 7 sa Branch 86 sa Dakbayan sa Mandaue .
Niadtong Abril 2019 pa nahitabo ang maong pagpatay ug giingong nagtago-tago kini pinaagi sa pagbalhin-balhin og pinuy-anan sa Dakbayan sa Lapu-Lapu ug Mandaue hangtod nga nadakpan niadtong Agosto 11, 2020 diha sa Consolacion.
Matud pa ni Lieutenant Colonel Koret nga ang maong dinakpan maoy main suspect sa pagpatay kang Calvin Flloyd Aton nga taga Lungsod sa Compostela.
Gitataw ni Korret nga human sila makadawat og impormasyon kabahin sa nahimutangan sa suspek dali nilang gihimo ang operasyon pagsikop niini. —/MEL (BANAT NEWS)
- Latest